ازاى تختار الموديول المناسب ليك

فكرت فى يوم انك تدخل مجال الساب بس فجأة لقيت نفسك محتار ومش عارف تختار انهى موديول يناسبك على حسب تخصصك العلمى او الدراسى او المهنى ؟؟

عشان كده فى المقالة دى هنساعدك ازاى تختار الموديول المناسب ليك بكل بساطة ومش بس كده هنفيدك برضه ونديلك معلومات عامة عن الموديولات التانية بشكل عام

فى البداية لازم تعرف ايه الموديولات اللى ساب بتقدمها …. ساب بتقدم مجموعة كبيرة من الموديولات اللى بتغطي جميع جوانب إدارة الأعمال

أهم موديولات برنامج الساب

SAP FI (Financial Accounting)

ده عبارة عن الموديول المسؤول عن العمليات المالية فى الشركة مثل المصروفات والديون والعملاء والموردين والارباح والخساير بما في ذلك إعداد التقارير المالية وإدارة الحسابات .

SAP CO (Controlling)

ده عبارة عن الموديول المسؤول عن المصروفات والايرادات الخاصة بالشركة والمقصود بالمصروفات هنا هى التكاليف او المصروفات الداخلية التى تتحملها الشركة فى سبيل عملية الانتاج ويهتم بمراقبة وإدارة التكاليف ويساعد الشركات في تحسين استخدام مواردها المالية.

SAP MM (Materials Management)

ده عبارة عن الموديول المسؤول عن إدارة المواد المصنعه فى الشركه من حيث المواصفات والمقاسات وكذلك عمليات الشراء والتخزين وإدارة الموارد والمواد بداية من عمليات الشراء إلى عمليات التخزين.

SAP SD (Sales and Distribution)

ده عبارة عن الموديول المسؤول عن عمليات البيع الخاصة بالشركه وترتيب الطلبات والتاكد من وجود المنتجات وجدوله التصنيع والتوصيل وعمليات التوزيع بداية من معالجة الطلبات إلى تسليم المنتجات.

SAP HCM (Human Capital Management)

ده عبارة عن الموديول المسؤول عن تنظيم ملفات الموظفين بالشركه والرواتب والعلاوات والمكافات وكل ما يتعلق بالموظفين وهو الخاص بإدارة الموارد البشرية والشؤون الوظيفية بما في ذلك التوظيف والتدريب.

SAP PP (Production Planning)

ده عبارة عن الموديول المسؤول عن عمليات تخطيط الإنتاج وإدارة العمليات التصنيعية .

SAP Payroll

ده عبارة عن الموديول المسؤول عن إدارة الرواتب والأجور للموظفين ويساعد الادارة فى دفع الرواتب بدقة وفي الوقت المناسب.

SAP PM (Plant Maintenance)

ده عبارة عن الموديول المسؤول عن ادارة عمليات الصيانة ويساعد في الحفاظ على المعدات والآلات بحالة جيدة.

SAP PS (Project System)

ده عبارة عن الموديول المسؤول عن المشاريع المختلفة من عمليات التخطيط إلى التنفيذ والمتابعة .

SAP CX (Customer Experience)

ده عبارة عن الموديول المسؤول عن إدارة علاقات العملاء ويساعد الشركات في تحسين التجارب الخاصة بالعملاء.

SAP Basis

ده عبارة عن الموديول المسؤول عن إدارة النظام والصيانة وايضا يعتبر الأساس التقني الذي يدعم كافة موديولات SAP .

SAP ABAP

ده عبارة عن لغة البرمجة الخاصة بـ SAP وتُستخدم لتطوير التطبيقات المخصصة داخل SAP او الموديولات الاخرى .

SAP Fiori

عبارة عن واجهة للسيستم ويوفر تجربة مستخدم محسنة عبر واجهات مستخدم حديثة وسهلة الاستخدام.

SAP Security

ده عبارة عن الموديول المسؤول عن إدارة الأمان داخل نظام SAP مما يضمن حماية البيانات من التهديدات.

SAP BW/HANA

ده عبارة عن النظام المسؤول عن إدارة البيانات الكبيرة وتحليلها باستخدام تقنيات متقدمة مثل HANA.

وبعد ماعرفنا ايه الموديولات المتاحة فى برنامج ال SAP نيجى بقى للموضوع الاساسى الخاص بالمقالة وهو ازاى تختار الموديول المناسب ليك لو انت لسه ف البداية ومحتار مش عارف تختار ايه

ازاى تختار الموديول المناسب ليك فى SAP

طبعاً أول حاجة بتبني عليها قرارك في تحديد الـ module المناسب ليك بتكون الخلفية التعليمية بتعتك او الـ educational background وده لأن طبيعة دراستك بتسهل عليك إستيعاب وفهم البيزنس او دورة العمل او business processes اللي بيتكلم عنها الموديول او التخصص ال هتدخله او ال هتختاره والسبب مرت عليك كتير أثناء دراستك الأكاديمية وبالتالي مش هتكون غريبة عليك ولا هتحس انك بتتكلم فى ناحية والـ module اللي بتدرسه ماشي في ناحية تانية !

– ناخد مثال بسيط ….يعنى لو دراستك كانت في مجال المحاسبة Accounting او خريج تجارة او محاسبة ادارية Managerial Accounting سواء تجارة عربى او انجلش …. فأكيد هنرشحلك دراسة موديول او تخصص المالية الـ SAP FI او SAP CO ولو أنت بقيت متمكن من الـ modules دي، ساعتها نقدر ننمى المهارات أكثر بموديول SAP BPC اللى هو SAP Business Planning and Consolidation .

– اما لو مجال دراستك هو اللوجيستيك او اى حاجة متعلقة بشغل المخازن والبضاعه والشحن والحاجات دى ف هنرشحلك دراسة موديول Supply Chain Management وهكذا فتقدر تدرس الـ SAP Materials Management واللي هيكون مفيد جداً ليك.. خلصته وعايز تبقي أقوي في المجال وتزود الخبرة يبقي تدخل علي SAP ARIBA و SAP SRM وممكن تبقى تقرى عنهم بعدين .

اما لو مجال تخصصك هو الـ Marketing او الـ Sales او شغل المبيعات وبتتعامل مع عملا يبقي الـ SAP Sales& Distribution module هيبقي الموديول المثالي جدا ليك ، وطبعاً مع الوقت اي modules من الـ SAP CRMهيكون مناسب ليك..

– اما لو مجال تخصصك الهندسة، سواء كانت Electrical او Mechanical او Industrial Management يبقي عليك وعلي الـ SAP Production Planning SAP PP وكالعادة بعد انتهائك منه وإكتسابك للخبرات بشكل كافي ممكن تدرس الـ Advanced منه وهو SAP APO module

اما لو مجال تخصصك الصيدلة يبقى موديول الـ SAP Quality Management ده مناسب جداً او موديول Chemical Engineering او Statistics او Quality Management

– اما لو انتا بتتعامل ف مجال الموارد البشرية والاتش ار ورواتب الموظفين والحاجات دى ف بنرشحلك موديول SAP HCM وأغلبه عبارة عن مبادئ ، والـ moduleالأعلي منه هو SAP SF

– بالنسبة لمجالات زي خريجى نظم معلومات او بتفهم ف شغل الشبكات والبرمجة والحاجات دى فبنرشحلك modules زي الـ SAP BASIS و ال SAP ABAP

نيجى بقى ل شوية حاجات لازم تحطها ف اعتبارك وانت بتختار الموديول المناسب ليك

١– مش شرط اساسى ان مجال الدراسة يكون هو الاساس فى اختيار الموديول المناسب … لان ممكن واحد يكون خريج علوم مثلا بس يبقى قوى جدا فى البرمجة .. وساعتها يقدر يشتغل ABAP عادى جداا …. وطبعا فى Modules مش محتاجة اى خلفية زى SD او MM او PM او HCM

٢– متربطش نفسك بالشهادة: بلاقى ناس كتير بتقولى مثلا انا مهندس مدنى وقالولى لازم تدخل PS …. ده مش صح ابدا … ممكن عادى تبقى مهندس وتشتغل MM او SD

٣–شوف واسأل السوق محتاج ايه؟ ودى نقطة مهمة جدااا … … وكل سوق فى العالم وليه احتياجاته ..وبتختلف من وقت للتانى… هديك مثال … الخليج فى فترة من الفترات كان محتاج جدااا لل HCM ولكن قبل الفترة دى كان ال HCM مش مطلوب اووى … وهكذا … ممكن مثلا مشروعات معينة فى البلد تبدأ تطبق SAP زى الحكومة … وساعتها هتلاقيهم طالبين ناس كتير اووى فى تخصصات معينة ليها علاقة بالحكومة

٤– ركز على ال Core Modules : ودى معناها الmodules الاساسية المطلوبة فى كل مشروعات SAP .. ومثال عليها المالية …مفيش مشروع SAP مفيهوش مالية … خلى دايما معاك Module اساسى وبعدها خد معاه Module فرعى …. يعنى مثلا اشتغل MM ومع الوقت اتعلم WM

٥– الجزء المادى: اختار ال Modules اللى مرتبتها اعلى … وده طبيعى لاننا بردوا بنشتغل عشان الفلوس … فى Modules مرتبتها اعلى من Modules تانية وعلى حسب البلد … مثال على كده … ال WM فى اوروبا مرتباتهم اعلى من ال SD وال MM … وده عشان نادريين ومش سهل تلاقى حد عنده خبرة كبيرة فيهم … دور وشوف انهى Modules مرتباتها اعلى واختارها

٦– انت بتحب ايه؟ : مهم جدا لما تختار حاجة تختار حاجة بتحبها عشان تبقى مبسوط وانت بتشتغلها وتكمل فيه … يعنى مثلا لو بنت ومش بتحب المخازن والشغل مع عمال المخازن ممكن تختار ال HCM وهيبقى شغلها مكتبى اكتر وهكذا

٧– لو عايز اكتر من Module : لو عايز تذاكر اكتر من Module اختار الحاجات المتشابهة المكملة … يعنى مثلا لو انت SD اختار MM متروحش تذاكر HCM … لان كده هتبقى بتشتشت نفسك وهتخسر وقت وصعب تلاقى شركة عايزة التخصصين مع بعض

وفى نهاية المقال نتمنى اننا نكون سهلنا عليك ولو حاجة بسيطة فى اختيار الموديول المناسب ليك

ولو عاوز تشوف فيديوهاتنا التعليمية اللى هتفيدك بشكل كبير فى بداية مشوارك فى مجال الساب ادخل على الفيديوهات دى